Artg musical de Radiotelevisiun Svizra Rumantscha (RTR)

Cun dumandar exact quai differentas persunas en la Rumantschia è l'«Artg musical» ì a la tschertga da respostas. Respostas che paran d'esser uschè diversas sco ils stils da musica ch'existan. Tedlar musica è insatge che pli u main mintgina e mintgin fa en ses mintga di. Ils motivs ed ils muments pertge che glieud sa deditgescha a questa actività san dentant esser daltuttafatg differents. Insatge para dentat tuttina d'esser cuminaivel: musica fa insatge cun nus umans, independent da la persuna u era dal stil da musica. Per dar in sguard sin questa tematica lascha l'emissiun discurrer a differentas persunas davart lur mund da musica ed era davart tge che la musica fa cun ellas ed els.

Il cornettist e chantadur giauda da sunar e chantar, da s'engaschar per il chant e la musica instrumentala. Auter che ses frar vegl Jachen (*1946) ed il segund frar Domenic (*1949) n'ha Duri Janett (*1951) betg enchaminà la via da musicist professiunal, malgrà ses dun musical. Sia encreschadetgna per la patria è stada memia ferma ed uschia ha el vivì sia passiun per la musica cun s'engaschar en la regiun Engiadina. E quai ha el fatg cun corp ed olma en chant e musica instrumentala. En «L'Artg musical» raquinta el da sia vita musicala.

L'Artg musical sa deditgescha a l'instrument tradiziunal che munta per blers era patria. L'emissiun porta suns e tuns d'in’emprova dals Sunatibas Postabiala cun ses manader Martin Monn, in discuors cun Curdin Stecher, in construider da tibas ed entras Felix Frank da l'Associaziun grischuna da jodladers datti er invista en questa scena da musica en il Grischun ed en la Svizra. E quella mussa ch’i dat er tar las tibas innovaziuns e svilups schizunt fitg moderns.

L'Artg musical dat in sguard sin la via musicala dal chantautur grischun, Linard Bardill. L'artist ch'è oz cunzunt enconuschent per sias chanzuns d'uffants, ha tranter auter era laschà inspirar da numerus texts da Men Rauch. Il musicist grischun cun ragischs en Engiadina Bassa e Val Müstair e creschì si a Cazas. Oz viva el a Scharans. Gia da giuven ha el cumenzà a chantar ed accumpagnar chanzuns cun la ghitarra e pli tard lura era a scriver atgna musica, quai cunzunt era pervi da sia grond'amur per litteratura. Metter en musica poesias è per Linard Bardill adina stà ina sort process per las chapir.

L’«Artg musical» preschenta l’istorgia d’in nov portatun. In disc cumpact, ma er ina platta da vinil tradiziunala cun musica jaura – quai è stà in giavisch dad Alfred Künzler, chirurg pensiunà ch’abitescha a Lü. Ensemen cun il clarinettist Stephan Britt, che ha ses domicil er en Val Müstair, ha el pudì realisar quest giavisch. En l’«Artg musical» discurrin nus cun ils dus protagonists co els han realisà il project. Ed a pled vegn era l’anteriur plevon Hans-Peter Schreich ch’enconuscha fitg bain l’istorgia culturala da la val.

Il chor maschadà da Danis-Tavanasa ha festivà ses giubileum cun in’idea innovativa. Il Chor Uvriu Danis-Tavanasa exista dapi il 2006. Ses giubileum ha el festivà en duas etappas: ina turnea da concert a Zuoz e Vignogn ed in concert da giubileum. Per il concert da giubileum ha il chor laschà scriver noss cumponists en tut 10 novas cumposiziuns cun texts da convischins da la vischnanca da Breil. In’idea innovativa che ha era fatg smirvegliar. En l’emissiun datti ultra dals discurs cun ils responsabels era da tadlar tuttas cumposiziuns novas.

Gia per la 11avla giada participescha la Liberty Brass Band a la concurrenza, questa giada er cun in solist rumantsch. A la 36avla ediziun dal Swiss Open Contest, la concurrenza da las meglras Brass Bands svizras, avain accumpagnà la Liberty Brass Band cun ses dirigent Stefan Roth ed il Principal cornetist Simon Gabriel. Per il giuven Engiadinais èsi ina premiera, la sfida ed il squitsch èn gronds, ses plaschair dentant era. En l'Artg discurran omadus davart lur preparativas ed ils exercizis.

Da la glioir da pasca fin melodias da mi’tatta – in’ura musicala cun il musicist surmiran. El è trubadur, musicist, litterat e pionier en pliras manieras. Benedetto Vigne ha passentà ina gronda part da sia vita cun la musica. Saja quai sco entusiast, musicist ubain redactur. Per el saja la musica ina passiun ed insatge che ha adina puspè gidà en sia vita.

L'ensemble ö! vegn onurà cun il premi da musica svizzer 2026. Dapi il 2002 exista l'ensemble ö! Tenor l'Uffizi federal da cultura haja l'ensemble francà la musica nova en ina regiun nua che questa sparta musicala n'existeva quasi betg. L'ensemble haja cun mirveglias e consequenza midà quai ed avert a blers e bleras novs munds musicals. Duas persunas ch'èn dapi l'entschatta en la furmaziun ö! èn ils fargliuns Riccarda e David Sontòn Caflisch. Ensemen cun auters fan els dapi passa dus decennis musica nova, musica contemporana. Ils dus fragliuns èn ils osps en l'emissiun da quest "Artg musical".

L'«Artg musical» dat in sguard enavos sin la Brassweek Samedan che ha gì lieu questa stad per la 15avla giada. En il center da l'emissiun stattan tuns, impressiuns e discurs cun differentas persunas ch'èn stadas part da la 15avla ediziun da quest'emna da musica cun renum internaziunal. Sper discurs cun Reto Caflisch e Ludwig Wilhalm ch'èn dus dals iniziants da l'emna, ha RTR era discurrì cun intginas participantas e participants da l'eveniment. La marca da quest'occurenza da musica: ina convivenza famigliara tranter profis, studentas ed amaturs da musica instrumentala.

La chantadura e musicista ch'è returnada il 2009 en sia patria a Rueun, festivescha quest onn ses anniversari rodund. Corin Curschellas crescha si en la chapitala grischuna ensemen cun il frar giuven e passenta in'affonza e giuventetgna cun blera musica e pauc rumantsch. La mamma chantava ed il bab sunava clavazin, improvisava, sunava er jazz. Dapi passa 50 onns tutga Corin Curschellas tar la scena da musica svizra e n'è betg stancla d'instradar novs project. Dapli dad ella e da sia vita musicala raquinta ella en l'Artg musical.

La «Scoula da musica Engiadina Bassa I Val Müstair» festivescha ses 50avel anniversari. In mez tschientaner nua che nundumbraivels tuns, melodias e talents han fatg resunar duas valladas muntagnardas. A chaschun da quest giubileum ha RTR discurrì cun trais dunnas che han ina colliaziun cun questa scola: l'emprima presidenta e pli tard manadra da la scola Flurinda Raschèr, la scolasta d'accordeon Sidonia Caviezel e la giuvna musicista da 12 onns Noemi Koller raquintan en l'«Artg musical» da lur colliaziun cun questa scola che ha contribuì enorm a l'entira regiun.

La pura, Gl’unviern ei cheu, Politica ni La parlera, quai èn ils titels d’intginas da sias poesias messas en musica. Il spiritual e poet Gion Cadieli, oriund da Sagogn, è naschì avant 150 onns. Ses relasch litterar è enconuschent be pli a paucas persunas, malgrà che sias poesias èn la basa d’intginas chanzuns enconuschentas e fitg enconuschentas. L’Artg musical va sin ils fastizs dal poet e da sia ovra.

Il musicist e magister da musica va en pensiun. En l’«Artg musical» discurra Iso Albin da sia via musicala. Davent da l’uffanza sco chantadur en il Chor d’affons Mustér sur il studi da posauna e chant fin a la lavur scientifica cun las rimnadas da chanzuns d’Alfons Maissen. In vast spectrum da musica demussa el er en la glista da giavischs da musica ch’i dat da tadlar en l’emissiun.